-ما تتكلمي.
أكملت هاتفة بسرعة:
-انا جايه اقعد معاكم كام يوم عشان سو تعلمني الطبيخ.
التفت ناظراً لمازن الذي أشار له بعينه موضحا الأمر؛ ففهم واقترب منه متسائلا بهمس:
-مش اتفقت معاك تروح لساجد؟ ايه اللي جابك هنا يا هادم اللذات انت؟
رد بنفس النبرة المنخفضة:
-جت فرصة حكاية تجارب المطبخ الفاشلة بتاعة اختك، وقولت لها اتعلمي من شيرين بس هي رفضت وقالت اتعلم من ياسمين، فملقتش طريقه اعرف ارفض من غير ما احسسها بحاجه.
تجهم وجهه وقال بتذمر:
-تقوم جاي في نفس اليوم! ما كنت صبرت للصبح.
ابتسم وهو يسخر منه:
-يا سيدي خير البر عاجله، آسفين لو قطعنا عليك مرة تانيه يا كبير.
دفعه من كتفه بغلظة وقال بحيرة:
-هعمل انا ايه في نرمين دلوقتي؟ ده انا قولت لأبوها يخليها هنا الكام يوم الجايين!
قاده فضوله لمعرفة بواطن الأمور فسأله:
-هي متخانقه مع جوزها؟
أومأ له وأكد:
-غالبا مش هيكملوا.
في الناحية اﻷخرى شاكستهما حنان بطيبة:
-چنى دي عامله زي الجنيه البراني، تلف تلف وترجع هنا.
ضحكن جميعا فلم تهتم وقالت بنهم:
-أنا جعانه أوي، واﻷكل باظ كله.
التفتت تسأل ياسمين:
-هو الحمل بيجوع كده؟
ضحكت وهي تجيبها:
-بس مش في الشهور اﻷولى، واضح انك حامل في دراكولا.
ضحكن مجدداً وهي تبلل شفتيها وتسألها:
-انتو طابخين ايه انهاردة؟
أجابتها فورا:
-فراخ ومكرونه.
صرخت معترضة:
-بس!
أجابتها وهي منهارة من الضحك:
-معلش بقى محدش عنده دماغ للمطبخ، أنتي جعانه يا چوچو اسخنلك؟
أومأت وهي تبتلع ريقها وتحركت معها لداخل المطبخ؛ فنظرت نرمين في إثرهما وعادت تستأذن حنان بأدب:
-عن إذنك يا داده هطلع أرتاح.. الوقت اتأخر أوي.
وقفت چنى تشاهد زوجة أخيها وهي تقوم بتسخين اﻷكل؛ فشعرت بالفضول ي.ها فسألتها أخيراً:
-هي نرمين قاعده هنا من امتى؟
أجابت بعفوية:
-لسه انهاردة.
توترت وقضمت شفتيها وسألت وهي تطقطق أصابع يدها:
-أومال مازن شافها فين على كده؟
أجابتها وهي تسكب الطعام باﻷطباق:
-هنا برده، بعد ما خلص شغل مع فارس.
أمسكت باﻷطباق وأشارت للبقية:
-هاتي دول معاكي.
وضعتا الطعام على المائدة فسألتها:
-مش هتتعشوا معانا؟
رد فارس وهو يتحرك بجوار مازن:
-احنا سبقناكم، كلوا انتوا وشوفو هتناموا فين ﻷن مظنش أوضتك القديمة تاخد رجلين مازن يا چوچو.
ضحكوا على المزحة التي لم يجدها المعني مضحكة فقال متذمرا:
-انا مش طويل أوي كده يعني.
رفع فارس حاجبه وهو يرفع عنقه لأعلى قائلا:
-أنا 184 وببصلك من تحت.
احتضنت چنى خصـ ـره وقالت بحب:
-ولا يهمك منهم يا حبيبي، هو ده الطول اللي بتحلم بيه أي ست.
حملها بيد واحدة كدمية قطنيه وغمز لها:
-ايوه Hullk وكلكم جنبي عرايس ورق.
شعر فارس بالضيق بعد أن قطع خلو ته مع زوجته فتحرك صوب الدرج وهو يسحب ياسمين معه:
-انا تعبان وعايز انام ودول دماغهم فاضيه، يلا بينا احنا وهم يتصرفوا بقى براحتهم.
التفت يرمقهما بنظرات مغتاظة وقال أخيراً:
-البيت بيتكم، تصبحوا على خير.
ابتسم مازن مجيباً:
– طبعاً، Enjoy يا بوص
❈-❈-❈
وصل منزل عائلته دالفاً بحدة وغضب؛ فاستقبلته والدته بفزع من منظرة المبعثر ودماءة المنسابة من انفه وفمه، فصرخت متفاجئة:
-ايه اللي حصل؟
اقترب أنس منه وتجهم وجهه وقال:
-اتكاتروا عليك وانت لوحدك طبعا.
أومأ له وقال:
-الحيوان اللي أسمه فارس، جته بغل … عبارة عن تور هايج متقدرش تزقه حتى.
لمعت عين أنس بالضيق وسأله:
-ايه اللي خلاه يتخانق معاك بس؟
أطبق على أسنانه بغل ورد:
-الهانم راحت عليهم وأهلها ميعرفوش حاجه أصلا.
ربت أنس على ظهره ومسح بيده وهو يواسيه:
-متقلقش، هي بتحاول تضغط عليك عشان تنفذ لها طلبها وتبعد عن هنا .. وهتستخدم كل أسلحتها عشان تفوز، لكن اللي هيكسب هو صاحب النفس الطويل؛ لأنها مستحيل تخرب بيتها بعد كام شهر جواز عشان حاجه تافهه زي دي.
صر مالك على أسنانه ونظر للأرض بضيق محاولاً كتم غيظة الذي تأجج بداخله ولا يعلم ما عليه فعله، فهل يخبر أخاه بما اتهموه به باطلاً؟ أم يصمت حتى لا تتأزم العلاقة بين زوجته وأهله أكثر من ذلك؟ فجلس على اﻷريكة وقال بصوت مختنق:
-انا هوريها شغلها، بس أتكلم مع ياسين بكره عشان ميزعلش مني بعد كده من اللي هعمله في أخته وفي الحيوان اللي متجوز بنت عمهم.
جلس أنس وتحاور معه بخبث متسائلا:
-انت مش كنت قولتلي إن ياسين ده كان طول عمرة بيحب بنت عمه، وجه فارس الفهد اخدها منه!
أومأ له وهو يرمقه بنظرات فضولية فأستمع له يضيف:
-يبقى ياسين آخر واحد ينفع يتدخل في الحكاية دي، سيبني أنا اتكلم معاها و…
قاطعه بتوتر ولهفة:
-ﻷ، أنت ﻷ.
فطن أنس لمنظر أخاه المرتعد، ولكنه أراد التاكد من حدسه ومن جرأتها على إتهامه حقا كما هددته؛
فسأله بريبة:
-أنا لأ ليه؟ أنا أخوك الكبير واللي كنت قاعد في خطوبتك وجوازك وأظن محدش غيري ينفع يتدخل و…
قاطعه مالك بضيق:
-مش هينفع يا أنس متضغطش عليا.
سأله باصرار:
-ليه طيب فهمني؟
رد بصوت هادر وعيون جاحظة:
-لأن الهانم بتتهمك أنك بتتحر ش بيها.
يتبع…
