_متحملنيش المسؤليه كلها انتى عارفه انى بحبه و هو جوزى برده . صاحت بغضب :
_يا سلام… ده المبرر طيب روحى قولى لمامتك و لا خالك الكلام ده و شوفى ردهم !هو عشان كاتب كتابك يبقى عادى ؟ اخبرتها برأيه :
_ما هو قالى انا جوزك و ده حقى .
ردت بخزى :
_ده انا المفروض احط جزمه فارس فوق دماغى و امشى بيها بقى اللى صبر عليا و انا مراته و فى بيته و لا ساجد اللى شيرين طلعت عينه اسبوعين و ياسين بيه اللى لو واحده مننا عملت كده كان طير رقيبتها ،ليه تعملو كده و تضيعوا فرحتكم بالشكل ده ؟ بكت ساندى بانهيار :
_انا جيالك تشوفيلى حل مش تفضلى تضايقينى . ردت بحسم :
_حلكم الوحيد تتجوزو طبعا مفيش حل غيره .
سألتها بحيره :
_ازاى و لسه يا دوب بيخلص فى الشقه و هو مش راضى نتجوز الا لما يخلص الديون اللى عليه . ردت بتقزز :
_يا بجاحته ،كمان مش راضى اومال عايزك تنزليه و لا ايه ؟ هتفت :
_لا هو لسه ميعرفش ،محدش يعرف غيرك . زفرت ياسمين انفاسها الحارقه و هتفت بضيق :
_خلاص يا ساندى انا هتصرف فى الحكايه دى، بس قوليله عشان يشيل معاكى المسؤليه .
ردت بحزن :
_ما انا هقوله انهارده .
~~~~~~~~~~~~~~~~~~~~~ اصبح فارس اكثر رومانسيه عن ذى قبل بعد ان اخبره طبيبه عن الحاله النفسيه و المزاجيه للمرأه الحامل و اكدت طبيبة امراض النساء على الامر فكان يكتب لها ابيات من الشعر و يضعها بجانب وسادتها و يذهب لعمله دون ايقاظها فتستيقظ على تلك المفاجئات الصغيره يوميا .
**************************
تَمَنَّيْتِ أَنَّ أُبَعْثِرَ إنوثتك بِتَفَاصِيلِ قَلَمِي
بِحِبْرِ أَشْوَاقِي…
عُلِيَ اوراق هِيَامِيِ وَغَرَامِيِ
تَمَنَّيْتِ أَنَّ اُسْكُبْ مِنْ شِفَاهِيِّ قِبْلَاتٍ
فَوْقَ إسمك فَوْقَ السُّطُورِ
وَأُسْكَبُ زُجاجَةَ عِطْرِ فَوْقَ وَصْفِكَ
وَاِزْرَعْ الف ياسْمِينَةَ مَعَ كُلُّ إِحْسَاسِ بِكَ اُكْتُبْهُ او شُعُورَ
تَمَنَّيْتِ ان تَتَحَوَّلُ احلامي حَقِيقَةَ
وَاُنْتُ اميرتها وَحِكَايَتَهَا
وَكُلُّ مافيها مِنْ نِساءِ وَزُهورِ ️
اِشْتَقْتِ الِيِكَ وَلِكَلاَمِكَ وَهَمْسَاتِكَ ـــــ♡ـــ
**************************
صرخت بفرحه من سعادتها فسمعها فارس من اسفل فهرع بخضه لغرفتها هاتفا :
_فى ايه ؟
ابتسمت مجيبه بحب :
_ايه الكلام الحلو ده ؟ امتعض وجهه و نظر لها بعتاب هاتفا :
_يا شيخه خضتينى . اقتربت منه و ارتفعت على اطراف اصابعها و تعلقت برقبه هاتفه بدلال :
_فااارس . رد بغزل محاوطا خصرها بذراعيه :
_عيونه . هتفت بحب :
_بحبك . ابتلع لعابه مجيبا :
_و انا بحبك يا عمرى . هتفت بدلال :
_كنت عايزاك فى موضوع . غمز لها و خلع سترة بدلته و هو يهجم عليها مازحا و ردد :
_و انا عندى كلام كتير اوى عايز اقوله .
منعته بكفها ضاحكه بمشاكسه و هتفت :
_دماغك على طول شمال ؟اسمع بس فى مشكله و كنت عيزاك تحلها . استمع لها باهتمام فقصت عليه مشكله ياسين و ساندى ليقول بغضب :
_ابن عمك ده مش راجل على فكره . هتفت بتوضيح :
_ما هى مراته برده . رد بصرامه :
_مراته، و حقه بس بالاشهار لان لو انكر هو بعد كده محدش هيقدر يثبتها عليه . تعجبت و سالته :
_ازاي ده ؟ مش في تحليل DNA و….
قاطعها بغضب :
_فضيحه للبنت و محاكم و اللي تتساهل في حقها تستاهل يتعمل فيها كده و هو طالما عايز يتنيل يتجوز كان خلص نفسه و اتلم هو و هى . ردت مدافعه :
_ده مطحون عشان الشقه و العفش ،انت بس متعرفش الشباب بتتعب ازاى عشان تجيب القرش . رد بامتعاض و حده :
_لا عارف يا ياسمين، عشان انا بتعب اكتر من اى حد و انتى عارفه فبلاش تقللى منى كده .
هتفت اعتذار :
_يا حبيبى انا مقصدش ، و عارفه انك بتتعب بس اقصد ان الشباب بيفحت في الصخر و مش بالساهل حد يعرف يتجوز . زفر بحده و قال بحسم :
_خلاص انا هحلها . سألت بفضول :
_هتعمل ايه ؟ اجاب بايجاز :
_قولت هحلها يا ياسمين ،هجوزهم . اعقبت بحيره :
_ما هو لسه مخلصش الشقه ؟ رد حازما :
_قولت خلاص كل حاجه هتخلص و نحدد فرحهم على الخميس اللى جاى .
ابتسمت بحب و قالت :
_انت جميل اوي . ضحك و قبلها قبله رقيقه و رد بغزل :
_كله عشان خاطر عيون الياسمين . هتفت بحيره :
_طيب و هنقول لعمى و لمامتها ايه ؟ رد بغروره المعتاد هاتفا بصرامه :
_قولى فارس امر بكده و محدش هيقدر يفتح بوقه . ابتسمت بسعاده و قالت بحب :
_حبيبي المغرور ،ربنا يخليك ليا يا رب بس انا مكسوفه منك اوى، ليه تكلف نفسك كل ده ؟
رد :
_دى حاجه بسيطه و يا ستى يعتبروها هديه جوازهم زى ما جبت الڤيلا لساجد و شيرين محدش قال لى كلفت نفسك ليه ؟ ردت موضحه :
_عشان ساجد زى اخوك و ابن عمك . قبلها من وجنتها و داعب انفها هاتفا :
_و ياسين زى اخوكى و ابن عمك .
~~~~~~~~~~~~~~~
دخل فارس بهيبته المعهوده فى زياره مفاجئه للشركه العالميه و دون اخطار مسبق و تقدم بخطى ثابته نحو قسم المبيعات حيث ياسين و ساندى و فور دخوله هب الجميع واقفين على ارجلهم فى احترام و رهبه لينظر فارس لجميع الموظفين و امرهم بصوت رخيم :
_انتو فى بريك لمده نص ساعه ،عايز فى ظرف 3 دقايق المكتب ده فاضى . بدأ الجميع بلملمه اشيائهم و الخروج من المكتب فاوقفهم صوته الاجش و هو يشير الى ياسين و ساندى هاتفا :
_ما عدا انتو الاتنين ،تعالو هنا انا عايزكم .
رد ياسين بتوتر :
_خير يا باشا ؟ رمقه بنظره حاده و تحدث بصرامه :
_انا مش هتكلم كتير ،ده عنوان مكتب ديكور هتاخدو بعضكم دلوقتى و تروحو سوا ،شوفو كل اللى ناقصكم و عايزينه و المكتب هينفذه من ديكورات و فرش و كل حاجه و اعملو حسابكم الفرح بتاعكم الخميس اللى جاى . هتف ياسين بخضه :
_بس ده احنا فاضل لنا حاجات كتير اوى يا باشا و انا…..
قاطعه فارس بحده :
_انا مش بعيد كلامى مرتين و متقلقش المصاريف كلها مدفوعه مقدما و دى هديه جوازكم منى انا و ياسمين . ردت ساندى بفرحه :
_ربنا يخليك لينا يا باشا . رفض ياسين معقبا :
_معلش يا باشا انا مقدرش اقبل هديه بالشكل ده…. قاطعه فارس ناظرا له بغضب و صر على اسنانه هاتفا بحزم :
_و لا كلمه تانيه ، و اللي في بطنها ده هتعملو فيه ايه ؟
اطرق ياسين رأسه بخزي فهتف فارس بضيق :
_انتو الاتنين غلطو و انا مش بتساهل فى الغلط و سبب اللى انا بعمله معاكم هو ياسمين و بس ،لكن انا لو عليا كان زمانى فاصل رقبتكم عن جسمكم . وجه بانظاره لياسين و اكد بغضب :
_عايز اشوفك راجل فى تصرفاتك من انهارده فاهم ؟ لانى مش هتساهل معاك تانى . ابتلع ياسين لعابه بحرج موافقا :
_اوامرك يا باشا .
صاح به بعصبيه :
_يا بنى انا مش بكلمك بصفتى فارس الفهد مديرك ،انا بكلمك بصفتى اخوك الكبير او جوز اختك الكبير و بنصحك إن اللى انت عملته غلط بكل المقاييس و انت الوحيد اللى متحمل مسؤليته لانك الراجل يا زفت . اعتذر مؤكدا :
_آسف يا باشا و اللى حصل مش هيتكرر تانى . ابتسم فارس و غمز له هاتفا بخبث :
_لا هيتكرر بس بعد يوم الخميس ، و اللى يسال ايه سبب السرعه دى هتقول انها اوامرى، فاهم ؟
رد باحترام :
_حاضر .
~~~~~~~~~~~~~~~~~~~~ تقلت ياسمين اتصال هاتفي غريب من رقم مجهول قبيل زفاف ياسين و ساندى بايام فأجابت بحيره :
_الو… مين معايا ؟ استمعت للطرف الآخر فلم تجد سوى صوت بكاء و انين فهللت بقلق :
_مين معايا ؟ فى ايه؟ ردت عاليا متصنعه البكاء و النحيب :
_انا عاليا يا ياسمين .
